Ad

Slider

လယ်ဧက ၄၀၀၀ ကျော် ရေပေးနိုင်သည့် ကလေးမြို့ မြောင်းချောင်းဆည် ပြန်လည်ပြုပြင်ထိန်းသိမ်ရန် ရှိ၊ မရှိ မေးမြန်း

ရန်ကုန်၊ မေ ၁၁

လယ်ဧက ၄၀၀၀ ကျော်အား ရေပေးနိုင်ပြီး ၂၀၁၅ ရေကြီးရေလျှံမှုကြောင့် ပျက်စီးခဲ့သော စစ်ကိုင်း တိုင်း၊ ကလေးမြို့နယ်ရှိ မြောင်းချောင်းဆည်အား လာမည့် မိုးကာလ စပါးစိုက်ရာသီအတွက် ပြုပြင် ထိန်းသိမ်းပေးရန် ရှိ၊ မရှိအဆိုအား မေလ ၁၁ ရက် ပြည်ထောင်စုလွှတ်တော် အစည်းအဝေး၌ ကလေးမြို့နယ် ပြည်သူ့လွှတ်တော် ကိုယ်စားလှယ် ဒေါ်အေးအေးမူ (ခ) ဒေါ်ရှားမီးက မေးမြန်းခဲ့သည်။

မြောင်းချောင်းဆည်မှာ ဒေသခံပြည်သူများ ကိုယ်ထူကိုယ်ထ တည်ဆောက်ထားသည့် ဆည်တစ်ခုဖြစ်ကာ ၂၀၁၅ ခုနှစ် ရေကြီးရေလျှံမှုဖြစ်စဉ်အပြီးတွင် ရေလွှဲဆည်နှင့် ရေပေးမြောင်း တံခါး ပျက်စီးကာ ဆည်အတွင်း ပေ ၃၀၀၀ ခန့်အထိ သဲနှုံးများ ပို့ချခံရမှုကြောင့် ထိခိုက် ပျက်စီးခဲ့သည့် ဆည်တစ်ခုလည်း ဖြစ်သည်။
၂၀၁၅ ခုနှစ် ရေကြီးရေလျှံမှု နောက်ဆက်တွဲအဖြစ် စိုက်ပျိုးလယ်မြေဧကများအတွင်း တင်ကျန်နေခဲ့သည့် သစ်လုံးကြီးများ။
ဓာတ်ပုံ - အောင်ထွန်းလင်း
“၂၀၁၅ ခုနှစ် ရေကြီးရေလျှံမှုဖြစ်စဉ်သည် အခြားမြေများနှင့်မတူဘဲ ရေများနှင့်အတူ သစ်တုံကြီးများ၊ အမှိုက်သရိုက် မြောက်မြားစွာနှင့် သဲနှုန်းများ အထူးများပြားစွာ ပါရှိပါသည်။ အဆိုပါ သစ်တုံးကြီးများနှင့် သဲနှုန်းများသည် လယ်ကွင်းတစ်လျှောက် ပြန့်ကျဲလျက် ကျန်ခဲ့ပြီး သဲနှုံးမှာ လယ်ကန်သင်းရိုးများနှင့် ရေသွင်းရေထုတ်မြာင်းများ ပျောက်ကွယ်လုမတတ် တင်ကျန်ခဲ့ပါသည်။ တောင်သူလယ်သမားများအနေဖြင့် သစ်တုံးများအား ဖယ်ရှားပြီး ဆောင်းသီးနှံ များ စိုက်ပျိုးနေကြပြီ ဖြစ်ပါသည်။ ဆောင်းသီးနှံ၏ သဘောမှာ ကန်သင်းရိုး ရေသွင်းရေထုတ် မြောင်းများ အထူးမလိုအပ်ပါ။ လာမည့် မိုးကာလ စပါးစိုက်ရာသီအတွက်မှာ လယ်ကန်သင်းရိုးများ ပြုပြင်ခြင်း၊ ဆည်မြောင်း ရေသွင်းရေထုတ်မြောင်းများ ပြုပြင်တူးဖော်ရန်မှာ အရေးတကြီး လိုအပ် နေပါသည်” ဟု ကလေးမြို့နယ် ပြည်သူ့လွှတ်တော် ကိုယ်စားလှယ် ဒေါ်အေးအေးမူ (ခ) ဒေါ်ရှားမီးက မေးမြန်းခဲ့ခြင်း ဖြစ်သည်။

ဒေသခံပြည်သူများအတွက် ကိုယ်စားပြုသည့် ဒေါ်အေးအေးမူ (ခ) ဒေါ်ရှားမီး၏ အဆိုမေးမြန်းမှုမှာ သူမ အနိုင်ရရှိခဲ့သည့် ဒေသအတွက် ပထမဆုံး မေးမြန်းမှုလည်း ဖြစ်သည်။

ကလေးမြို့နယ်တွင် လူဦးရေ ၃၄၀,၀၀၀ ကျော်ရှိကာ ယင်းထဲမှ ၂၁၀,၀၀၀ ကျော် (၆၂.၆ ရာခိုင်နှုန်း) မှာ ကျေးရွာနေ ပြည်သူများဖြစ်ကာ အဓိကအားဖြင့် စိုက်ပျိုးရေးလုပ်ငန်းများ လုပ်ကိုင်နေကြသူများ ဖြစ်သည်။ ကလေးမြို့နယ်အတွင်း အသားတင်စိုက်ပျိုးမြေဧက ၉၀,၀၀၀ ကျော်ရှိသည့်အနက် ပြီးခဲ့သည့် ၂၀၁၅ ရေကြီးရေလျှံမှုကြောင့် ဧက ၈၀,၀၀၀ ကျော် ပျက်စီးခဲ့ကာ အရေးပေါ်အခြေအနေ ကြေညာခဲ့ရသည်။

ဒေါ်အေးအေးမူ (ခ) ဒေါ်ရှားမီး၏ မေးမြန်းမှုနှင့် ပတ်သက်၍ “မြောင်းချောင်းရေလွှဲဆည်နှင့် ရေပေးမြောင်းသည် ကလေးမြို့နယ် တောင်ဘက်ရှိ ရွာဆည်သာရွာအုပ်စု၊ မြောက်စည်း တောင်စည်းကျော်ရွာ၊ ခုံတိုးမြို့သာကျေးရွာ အုပ်စုတို့မှ လယ်ဧက ၄၀၀၀၀ ကျော် မိုးစပါး စိုက်ပျိုးရေး ပေးဝေလျက်ရှိပြီး ၂၀၁၅ ခုနှစ်တွင် ဖြစ်ပွားခဲ့သော ရေကြီးရေလျှံမှုကြောင့် ရေလွှဲဆည် နှင့် ရေပေးမြောင်းထိပ်တံခါး ပျက်စီးသွားပြီး ရေပေးမြောင်းအတွင်း ပေ ၃၀၀၀ ခန့် သဲနှုံးများ ပို့ချခဲ့သဖြင့် ၂၀၁၅-၂၀၁၆ ဘဏ္ဍာနှစ်တွင် မြောင်းချောင်းရေပေးမြောင်းအတွင်း သဲနှုံးများ တူးဖော်ခြင်းနှင့် ရေပေးအဆောက်အအုံများ ပြုပြင်ဆောက်လုပ်ခြင်း လုပ်ငန်းများကို ဆောင်ရွက်ပေးခဲ့ပါသည်။ ရေကြီးရေလျှံမှုကြောင့် ထိခိုက်ပျက်စီးခဲ့သည့် ရေလွှဲဆည်နှင့် ရေပေးမြောင်းထိပ်တံခါးမှာ ပြုပြင်အသုံးပြုရန် မသင့်တော်တော့သဖြင့် ယခင် ရေပေးမြောင်းထိပ်ဝမှ အထက် ၄၀၀ ပေအကွာတွင် ပြောင်းရွှေ့တည်ဆောက်ပြီး ရေပေးဝေ နိုင်ရေးအတွက် ဆောင်ရွက်ပေးရမည် ဖြစ်ပါသည်။ ရေလွှဲဆည်နှင့် မြောင်းထိပ်တံခါး တည်ဆောက်ခြင်းလုပ်ငန်းများအား ဆောင်ရွက်နိုင်ရန် ၂၀၁၆-၂၀၁၇ ဘဏ္ဍာရေးနှစ်တွင် တိုင်းဒေသကြီးရန်ပုံငွေ လျာထားခွဲဝေပြီး ဖြစ်ပါသဖြင့် လုပ်ငန်းများ စတင် ဆောင်ရွက်လျက်ရှိနေပြီ ဖြစ်ပါကြောင်း ရှင်းလင်းတင်ပြအပ်ပါသည်” ဟု ဒုဝန်ကြီး ဒေါက်တာထွန်းဝင်းက ပြန်လည်ဖြေကြားခဲ့သည်။

အောက်ချင်းသစ္စာ သတင်းအေဂျင်စီ
0

No comments

Post a Comment

Mega Menu

blogger
© all rights reserved
made with by templateszoo