Ad

Slider

မြန်မာတစ်နိုင်ငံလုံးအတွက် မီးသတ်ယာဉ် ၃၀၁၇ စီးသာ ရှိ

ရန်ကုန်၊ မေ ၁၀

နိုင်ငံတစ်ဝန်း မီးဘေးအန္တရာယ်ကြုံလာပါက မီးငြိမ်းသတ်နိုင်ရန်အတွက် မီးငြိမ်း၊ မီးသတ်ရေယာဉ်ပေါင်း ၃၀၁၇ စီးသာ ရှိကြောင်း မေလ ၉ ရက်က ပြုလုပ်သည့် ပြည်သူ့လွှတ်တော် အစည်းအဝေးတွင် ပြည်ထဲရေးဝန်ကြီးဌာန၊ ဒုဝန်ကြီး ဗိုလ်ချုပ်အောင်စိုးက ထုတ်ဖော် ပြောဆိုလိုက်သည်။

မီးဘေးအန္တရာယ် ကြုံတွေ့လာပါက မီးငြိမ်းသတ်နိုင်ရန်အတွက် မီးငြိမ်းသတ်ယာဉ်၊ မီးသတ်ရေယာဉ်၊ မီးသတ်စက်ယာဉ်၊ မီးသတ်အထောက်အကူပြုယာဉ် စသဖြင့် အမျိုးအစားလေးမျိုး ရှိကာ ယင်းလေးမျိုး စုစုပေါင်း ၃၀၁၇ စီးသာ ရှိကြောင်း ညောင်လေးပင်မြို့နယ် ပြည်သူ့လွှတ်တော် ကိုယ်စားလှယ် ဒေါက်တာမြင့်သိန်း၏ မေးမြန်းချက်နှင့် ဆက်စပ်၍ ထည့်သွင်း ပြောဆိုခဲ့ခြင်း ဖြစ်သည်။
နှစ် ၇၀ ပြည့် မီးသတ်တပ်ဖွဲ့နေ့တွင် သရုပ်ပြ မီးငြိမ်းသတ်နေသည့် မီးသတ်ယာဉ်များ။ Photo by Myo Thettun’s facebook
“မီးသတ်ယာဉ် စက်များ ဖြည့်တင်းမှု အခြေအနေမှာ ၂၀၁၁-၁၂ ဘဏ္ဍာရေးနှစ်မတိုင်မီ တစ်နိုင်ငံလုံးအတွက် မီးသတ်ယာဉ်စုစုပေါင်း ၁၂၈၂ စီးရှိသော်လည်း ၂၀၁၁-၁၂ ခုမှ ၂၀၁၅-၁၆ ခုနှစ်ထိ မီးငြှိမ်းသတ်ယာဉ်၊ မီးသတ်ရေယာဉ်၊ မီးသတ်စက်ယာဉ်၊ မီးသတ်အထောက်အကူပြုယာဉ် စုစုပေါင်း ၁၇၃၅ စီး ထပ်မံ ဖြည့်တင်းနိုင်ခဲ့ပြီး ယခုအခါ စုစုပေါင်း မီးသတ်ယာဉ် ၃၀၁၇ စီးဖြင့် တစ်နိုင်ငံလုံး ဖြန့်ခွဲ ဆောင်ရွက်လျက် ရှိပါကြောင်း” ပြည်ထဲရေး ဒုဝန်ကြီး ဗိုလ်ချုပ်အောင်စိုးက ပြောသည်။

မီးသတ်ဦးစီးဌာန၏ ဖွဲ့စည်းပုံအရ တပ်ဖွဲ့အင်အားမှာ ၁၄၇၃၆ ဦးရှိသော်လည်း ယခုအချိန်တွင် ဖွဲ့စည်းပုံ၏ ၃၂.၂ ရာခိုင်နှုန်း (၀န်ထမ်း ၅၀၀၀ ခန့်) ကိုသာ ခန့်အပ်ဆောင်ရွက်လျက်ရှိပြီး တိုင်းဒေသကြီးနှင့် ပြည်နယ်များတွင် အရံမီးသတ်တပ်ဖွဲ့ဝင် ၂၈၁၂၅၇ ဦး၊ စက်ရုံ/အလုပ်ရုံ၊ လုပ်ငန်းဌာနများတွင် သီးသန့် မီးသတ်တပ်ဖွဲ့ဝင် ၁၇၄၄၁ ဦးကိုမူ စည်းရုံးဖွဲ့စည်းထားကြောင်းလည်း ဗိုလ်ချုပ်အောင်စိုးက အဆိုနှင့် ပတ်သက်၍ ထည့်သွင်းရှင်းလင်းခဲ့သည်။

၂၀၁၆ ခုနှစ် နှစ်ဆန်းပိုင်းအတွင်း မြန်မာနိုင်ငံရှိ ဒေသအချို့တွင် မီးဘေးအန္တရာယ်နှင့် ရင်ဆိုင်ခဲ့ရကာ ရန်ကုန်မြို့ မင်္ဂလာဈေး၊ ရှမ်းပြည်နယ် မြောက်ပိုင်း ပလောင်ကိုယ်ပိုင်အုပ်ချုပ်ခွင့်ရဒေသရှိ နန့်စနန်မြို့၊ ဧရာဝတီတိုင်း လပွတ္တာမြို့၊ တနင်္သာရီတိုင်း ပုလောမြို့နယ် ကျောက္ကာမြို့၊ မန္တလေးမြို့ မင်္ဂလာဈေးတို့တွင် ဖြစ်ပွားခဲ့သော မီးလောင်မှုများမှာ စံချိန်သစ်တင်ရမည်အထိ ဆုံးရှုံးမှုပမာဏ ကြီးမားခဲ့သည်။

ညောင်လေးပင်မြို့နယ် လွှတ်တော်ကိုယ်စားလှယ် ဒေါက်တာမြင့်သိန်း၏ အဆိုနှင့် ပတ်သက်၍ ပြည်ထဲရေးဝန်ကြီးဌာန၊ ဒုတိယ၀န်ကြီး ဗိုလ်ချုပ်အောင်စိုး၏ ရှင်းလင်းချက်အား ပြည်သူ့လွှတ်တော်၏ www.pyithuhluttaw.gov.mm တွင် ပြန်လည် ဖော်ပြထားသော်လည်း ဗိုလ်ချုပ်အောင်စိုး၏ ရှင်းလင်းချက်တချို့ကိုမူ ဖော်ပြထားခြင်း မရှိပေ။

ချန်လှပ်ခံရသည့် ရှင်းလင်းချက်တချို့တွင် မီးလောင်သည့် Level တူညီသော်လည်း နေပြည်တော်တွင် လောင်ကျွမ်းပါက လွှတ်ရသည့် မီးသတ်ယာဉ် အရေအတွက်မှာ အခြားမြို့နယ်များတွင် လောင်ကျွမ်းပါက လွှတ်ရသည့် အရေအတွက်ထက် များစွာ ပိုနေသည့်အချက်ပင် ဖြစ်သည်။

အောက်ချင်း သတင်းအေဂျင်စီ
0

No comments

Post a Comment

Mega Menu

blogger
© all rights reserved
made with by templateszoo