ကလေးမြို့၊ ထိုမာရွာရှိ တောင်သူ ၆၅၅ ဦးအတွက် စိုက်ပျိုးရေးပစ္စည်းများ FAO ထောက်ပံ့

FAO မှ ထောက်ပံ့ပေးမည့်ပစ္စည်းများအား သယ်ဆောင်လာစဉ်။ ဓာတ်ပုံ - သန့်ဇင်ဆွေ (အောက်ချင်း သတင်းအေဂျင်စီ)

ကလေး၊ မတ် ၃၀

ရေဘေးသင့်မှုကြောင့် စိုက်ပျိုးရေးလုပ်ရန်အတွက် အခက်အခဲရှိနေသည့် စစ်ကိုင်းတိုင်း၊ ကလေးမြို့နယ်၊ ထိုမာ စက်မှုလယ်ယာစံပြကျေးရွာရှိ နေကြာစိုက်တောင်သူ ၆၅၅ ဦးအတွက် ကမ္ဘာ့စားနပ်ရိက္ခာအဖွဲ့ FAO က စိုက်ပျိုးရေးသုံးပစ္စည်းများကို မေလ ၃၀ ရက်တွင် ထောက်ပံ့ကူညီလိုက်သည်။

အဆိုပါ FAO ၏ အကူအညီများကို World Vision အဖွဲ့က တစ်ဆင့် ပေးအပ်လှူဒါန်းခဲ့ခြင်းဖြစ်ပြီး ယင်းထောက်ပံ့ရေး ပစ္စည်းများ မပေးအပ်မီ မတ်လ ၂၉ ရက်ကလည်း စိုက်ပျိုးရေးဆိုင်ရာ နည်းစနစ်များနှင့် ပတ်သက်၍ သင်တန်းများလည်း ပေးခဲ့သေးသည်။

ရွာသူရွာသားများအား ထောက်ပံ့ရေးပစ္စည်းများ ပေးအပ်နေစဉ်။ ဓာတ်ပုံ - သန့်ဇင်ဆွေ (အောက်ချင်း သတင်းအေဂျင်စီ)

“ထိုမာရွာမှာရှိတဲ့ တောင်သူတွေဟာ ရေကြီး၊ ရေနစ်မြုပ်သွားတဲ့အခါမှာ သူတို့မှာ အခက်အခဲများစွာ ကြုံတယ်။ အဲဒီ အခက်အခဲများထဲက လွန်မြောက်နိုင်ဖို့ရာအတွက် ဒီမှာ ကလေးမြို့နယ် စိုက်ပျိုးရေးဌာနနဲ့ ပူးပေါင်းပြီးတော့ စိုက်ပျိုးရေးသင်တန်းလေးလည်း ကျွန်တော်တို့ လုပ်ပါတယ်။ အဲဒီစိုက်ပျိုးရေး သင်တန်းလေးမှာဆိုရင် စိုက်ပျိုးရေးဌာနက အရာရှိနှစ်ယောက် ကျွန်တော်တို့ လာပြီး ပါဝင်တယ်။ ဒီမှာရှိတဲ့ မျိုးအခက်အခဲ၊ မြေဆီအသုံးပြုနည်း နည်းစနစ်၊ ပိုးမွှားအန္တရာယ် အခက်အခဲတွေကို အတူတကွ ဖြေရှင်းတာ ဖြစ်ပါတယ်။ ဒါကလည်း ဘာလဲဆိုတော့ တောင်သူတွေက Skill ပေါ့။ သူ့ရဲ့ စွမ်းရည် မြင့်တက်လာဖို့နဲ့ နောက်တစ်ခုက သူတို့ရဲ့ အခက်အခဲထဲကနေပြီး ဒီစွမ်းရည်နဲ့ လွန်မြောက်နိုင်ဖို့ ကျွန်တော်တို့ ရည်ရွယ်ပါတယ်” ဟု World Vision မှ Project Coordinator ဦးတင်ထွန်းမြင့်က အောက်ချင်းသတင်းအေဂျင်စီသို့ ပြောသည်။

FAO မှ ထောက်ပံ့သည့်ပစ္စည်းများအား ရွာသားများက တစ်ဦးချင်းစီအလိုက် လက်မှတ်ထိုး ထုတ်ယူနေကြစဉ်။ ဓာတ်ပုံ - သန့်ဇင်ဆွေ (အောက်ချင်း သတင်းအေဂျင်စီ)

ထောက်ပံ့ပေးသည့် စိုက်ပျိုးရေးပစ္စည်းများမှာ ၅၀ ကီလိုဂရမ်ပါ NPK အမျိုးအစား မြေဆီ နှစ်အိတ်၊ စိုက်ပျိုးရေးသုံးပစ္စည်း တစ်စုံ၊ ရေပန်းခရား တစ်ခု၊ အရိုးတံပါ ပေါက်ပြား တစ်စုံ၊ တံစဉ် တစ်ခုနှင့် မျိုးစေ့ထုပ် (ခရမ်းချဉ်၊ မုံလာဥဖြူ၊ ရုံးပတီသီး) တစ်ထုပ်စီတို့ ဖြစ်သည်။

“ရေဘေးသင့်တဲ့ တောင်သူတွေကို အခုလို ထောက်ပံ့တာ အင်မတန်ကို ၀မ်းသာပါတယ်။ လက်တွေ့ သူတို့ကိုယ်တိုင် လက်မှတ်ထိုးပြီးတော့ ပေးတယ်။ တိုက်ရိုက်ယူတဲ့ စနစ်ပါ။ လူတွေလက်ထဲကို တိုက်ရိုက်ရောက်တဲ့စနစ်ပါ” ဟု ထောက်ပံ့ရေးပစ္စည်းများ ရရှိခဲ့သူ ဒေသခံ ဦးသန်းညွန့်ဦးက အောက်ချင်း သတင်းအေဂျင်စီသို့ ပြောသည်။

FAO မှ ထောက်ပံ့ပေးသည့် စိုက်ပျိုးရေးလုပ်ငန်းသုံး ပစ္စည်းများ။ ဓာတ်ပုံ - သန့်ဇင်ဆွေ (အောက်ချင်း သတင်းအေဂျင်စီ)

ယခုကဲ့သို့သော ထောက်ပံ့မှုများကို ကလေးမြို့နယ်အတွင်းရှိ စိုက်ပါးစိုက်တောင်သူ ၁၀၀၊ မြေပဲစိုက်တောင်သူ ၁၀၀၀ နှင့် နေကြာစိုက်တောင်သူ ၁၀၀၀၊ စုစုပေါင်း တောင်သူ ၂၁၀၀ အတွက် FAO က ကူညီပေးခဲ့ပြီး ဖြစ်သည်။

သန့်ဇင်ဆွေ (အောက်ချင်းသတင်းအေဂျင်စီ)