Ad

Slider

နိုင်ငံခြားရေးဝန်ကြီး တာဝန်ယူပါက ဒေါ်အောင်ဆန်းစုကြည် ကာ/လုံအဖွဲ့ဝင် ဖြစ်ပြီ

ကာ/လုံ တွင် တပ်မတော်ဘက်မှ ခြောက်ဦး နေရာယူထား

ရန်ကုန်၊ မတ် ၂၄

ဝန်ကြီးဌာန လေးခုအား ကိုယ်တိုင်ကိုင်တွယ် စီမံဆောင်ရွက်မည်ဟု သတင်းထွက်နေသည့် ဒေါ်အောင်ဆန်းစုကြည်အား မတ်လ ၂၄ ရက်တွင် ပြည်ထောင်စုလွှတ်တော်က ပြည်ထောင်စုဝန်ကြီးအဖြစ် အတည်ပြုလိုက်ပြီဖြစ်သည့်အတွက် နိုင်ငံခြားရေးဝန်ကြီးဌာနအား ကိုင်တွယ်မည်ဆိုပါက အမျိုးသားကာကွယ်ရေးနှင့် လုံခြုံရေးကောင်စီ (ကာ/လုံ) တွင် အဖွဲ့ဝင်အဖြစ် ပါဝင်ခွင့် ရရှိသွားပြီ ဖြစ်သည်။

၂၀၀၈ ဖွဲ့စည်းပုံအခြေခံဥပဒေ ပုဒ်မ ၂၀၁ အရ အမျိုးသား ကာကွယ်ရေးနှင့် လုံခြုံရေးကောင်စီကို သမ္မတနှင့် ဒုသမ္မတ နှစ်ဦး၊ လွှတ်တော်နှစ်ရပ် ဥက္ကဋ္ဌ၊ တပ်မတော်ကာကွယ်ရေးဦးစီးချုပ်နှင့် ဒု ကာကွယ်ရေးဦးစီးချုပ်၊ ၀န်ကြီးဌာန လေးခုဖြစ်သည့် ကာကွယ်ရေး၊ နိုင်ငံခြားရေး၊ ပြည်ထဲရေးနှင့် နယ်စပ်ရေးရာဝန်ကြီးတို့ဖြင့် ဖွဲ့စည်းရမည်ဟု ပြဋ္ဌာန်းထားသည့်အတွက် ဒေါ်အောင်ဆန်းစုကြည် အနေဖြင့် အဖွဲ့ဝင်အဖြစ် ပါဝင်ခွင့် ရရှိမည် ဖြစ်သည်။

သို့သော် မီဒီယာများတွင် NLD တာဝန်ရှိသူများဘက်မှ ဒေါ်အောင်ဆန်းစုကြည် အနေဖြင့် နိုင်ငံခြားရေး ၀န်ကြီးအပြင် အခြားဝန်ကြီးဌာန သုံးခုကိုပါ တာဝန်ယူမည်ဟု ပြောဆိုမှုများရှိနေသော်လည်း ယခုအချိန်အထိ ၀န်ကြီးအဖြစ် ခန့်အပ်ခံရသူများမှာ မည်သည့် ၀န်ကြီးဌာနအား တာဝန်ယူမည်ကို တိကျစွာ ထုတ်ပြန်ထားခြင်း မရှိသေးပေ။

လက်ရှိ အနေအထားအရ အဖွဲ့ဝင် ၁၁ ဦးဖြင့် ဖွဲ့စည်းသည့် ကာ/လုံအဖွဲ့တွင် NLD အပါအ၀င် နိုင်ငံရေးပါတီများဘက်မှ ငါးဦးအထိသာ ပါဝင်ခွင့်ရရှိထားပြီး တပ်မတော်များဘက်ကမူ ခြောက်ဦး အထိ ပါရှိနေသည့်အတွက် အရေးကြီးသည့် ဆုံးဖြတ်ချက်များ ချမှတ်ရာတွင်မူ တပ်မတော်ဘက်မှ အသာစီး ရလျက် ရှိသည်။

၂၀၀၈ ခြေ/ဥအရ အရေးကြီးသည့် ကာ/လုံ အဖွဲ့မှာ နိုင်ငံအတွင်း အုပ်ချုပ်ရေးဆိုင်ရာ လုပ်ငန်းများအား ဖွဲ့စည်းပုံအခြေခံဥပဒေ ပါ ပြဋ္ဌာန်းချက်များနှင့်အညီ ဆောင်ရွက်နိုင်စွမ်း မရှိကြောင်း သိရှိလျှင်သော်လည်းကောင်း၊ သက်ဆိုင်ရာ အာဏာပိုင်အဖွဲ့အစည်းက တင်ပြလျှင်သော်လည်းကောင်း နိုင်ငံတော်သမ္မတသည် ကာ/လုံ အဖွဲ့နှင့် ညှိနှိုင်းကာ ဥပဒေကဲ့သို့ အာဏာတည်သည့် အမိန့်ထုတ်ပြန်၍ အရေးပေါ် အခြေအနေ ကြေညာနိုင်သည်ဟု အခြေခံဥပဒေ ပုဒ်မ ၄၁၀ တွင် ပြဋ္ဌာန်းထားသည်။

ထို့ပြင် ပုဒ်မ ၄၂၅ တွင် ယင်းသို့ အရေးပေါ်အခြေအနေ ကြေညာ၍ တပ်မတော်အား အာဏာလွှဲပေးထားချိန်တွင် တပ်မတော် ကာကွယ်ရေး ဦးစီးချုပ်သည် စစ်အုပ်ချုပ်ရေး သက်တမ်းအား ခြောက်လ နှစ်ကြိမ်ဖြင့် တစ်နှစ်အထိ သက်တမ်းတိုးမြှင့်နိုင်သည်ဟု ဖော်ပြထားသည်။

အောက်ချင်း သတင်းအေဂျင်စီ
0

No comments

Post a Comment

Mega Menu

blogger
© all rights reserved
made with by templateszoo