Thursday, May 17, 2018

aung7

ဝန်ကြီးအပြောင်းအလဲ သတင်းထွက်ပေါ်ပြီးနောက် ချင်းပြည်နယ်ဝန်ကြီး နုတ်ထွက်

ရန်ကုန်၊ မေ ၁၈

သမ္မတ ဦးဝင်းမြင့် တက်လာပြီးနောက်ပိုင်း ၀န်ကြီးများ အပြောင်းအလဲရှိနိုင်ကြောင်း သတင်းများ ထွက်ပေါ်ပြီးနောက် မေလ ၁၇ ရက်က ချင်းပြည်နယ်အစိုးရအဖွဲ့၊ စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီးဌာန၀န်ကြီး ဆလိုင်းအိုက်ဇက်ခင် ရာထူးမှ နုတ်ထွက်သွားပြီ ဖြစ်သည်။

မိမိသဘောဆန္ဒအလျောက် နုတ်ထွက်ခွင့်တင်သည့်အတွက် ခွင့်ပြုလိုက်ခြင်းဖြစ်ကြောင်း သမ္မတရုံး ထုတ်ပြန်ချက်တွင် ဖော်ပြထားပြီး ယခုကဲ့သို့ နုတ်ထွက်ရခြင်းမှာ မိမိအား တာဝန်ပေးထားသည့် လုပ်ငန်းများအား အဆင်ပြေစွာ လုပ်ဆောင်နိုင်မှု မရှိသည့်အပေါ် တာဝန်ယူမှု၊ တာဝန်ခံမှုအပြည့်ဖြင့် နုတ်ထွက်ခွင့်တင်ခဲ့ခြင်းဖြစ်ကြောင်း နုတ်ထွက်သွားသူ ၀န်ကြီးက ၎င်း၏ လူမှုကွန်ရက် စာမျက်နှာပေါ်တွင် ရေးသားထားသည်။

“ဟားခါးမြို့ပြစီမံကိန်း၊ ဟားခါးဈေးတည်ဆောက်ရေးနှင့် ဖလမ်းရေပေးရေးစီမံကိန်းလုပ်ငန်းများ အကောင်အထည်ဖော်ဆောင်ရွက်ရာမှာ သတ်မှတ်အချိန်ကာလအတွင်း အဆင်ပြေချောမွေ့စွာ အကောင်အထည်ဖော် ဆောင်ရွက်နိုင်ခြင်း မရှိခဲ့တဲ့အတွက် သက်ဆိုင်ရာပြည်သူလူထုတွေမှာ အခက်အခဲတွေ ကြုံတွေ့ခဲ့ရတာကြောင့် မိမိကွပ်ကဲမှုအောက်ရှိ လုပ်ငန်းများနှင့် ပတ်သက်၍ တာဝန်ယူ၊ တာဝန်ခံမှုပြုတဲ့အနေနဲ့ မိမိသဘောဆန္ဒအလျောက် ရာထူးတာဝန်မှ နုတ်ထွက်ခွင့်ပြုရန် တင်ပြခဲ့ပြီး၊ ယမန်နေ့ (၁၇၊ မေလ ၂၀၁၈)မှာ နိုင်ငံတော်သမ္မတကြီးက တရားဝင် ခွင့်ပြုပေးလိုက်ပြီဖြစ်ပါတယ်” ဟု ၀န်ကြီး (ဟောင်း) ဆလိုင်းအိုက်ဇက်ခင်က ရေးသားထားသည်။

ဆလိုင်းအိုက်ဇက်ခင်မှာ NLD ခေါင်းဆောင်သည့် အစိုးရသက်တမ်းအတွင်း မိမိတာဝန်ယူထားသည့် လုပ်ငန်းများ အဆင်ပြေချောမွေ့ အောင်မြင်အောင် လုပ်ဆောင်နိုင်ခြင်းမရှိသည့်အတွက် တာဝန်ယူမှု၊ တာဝန်ခံမှုအပြည့်ဖြင့် နုတ်ထွက်ခွင့်တင်သည့် ပထမဆုံး ၀န်ကြီးလည်း ဖြစ်သည်။

နုတ်ထွက်သွားသူ ၀န်ကြီးမှာ ချင်းပြည်နယ်အစိုးရအဖွဲ့အတွင်း အတက်ကြွဆုံးနှင့် အလုပ် အလုပ်ဆုံးဝန်ကြီးအဖြစ် လူသိများသူဖြစ်ကာ တာဝန်ထမ်းဆောင်ချိန်ကာလအတွင်း ၎င်းကြောင့် ထိခိုက်နစ်နာမှုများ ရှိခဲ့မည်ဆိုပါက မိမိအားနည်းချက်သာဖြစ်ကြောင်းလည်း လူမှုကွန်ရက်တွင် ရေးသားထားသည်။

“မိမိအနေနဲ့ တာဝန်ထမ်းဆောင်စဉ် (၂)နှစ်တာကာလအတွင်း ပြည်နယ်အကျိုးအတွက် ကိုယ်ကျိုးမဖက် ရိုးသားမှန်ကန် သန့်ရှင်းဖြောင့်မတ်စွာ ကြိုးစားထမ်းရွက်ခဲ့ပါတယ်။ အကြောင်းအမျိုးမျိုးကို အခြေခံပြီး မိမိကြောင့် ထိခိုက်နစ်နာမှုတွေ ဖြစ်ပေါ်ကြုံတွေ့ခဲ့ရတာမျိုးရှိခဲ့မယ်ဆိုရင်လည်း မိမိရဲ့ အားနည်းချက်တွေပဲဖြစ်လို့ နားလည်ခွင့်လွတ်ပေးကြဖို့ ပန်ကြားလိုပါတယ်” ဟု ဆလိုင်းအိုက်ဇက်ခင်က မေလ ၁၈ ရက်မနက်ပိုင်းတွင် ရေးသားထားသည်။

အောက်ချင်းသစ္စာ သတင်းအေဂျင်စီ

aung7

About aung7 -

Aung Htun Linn.. The Hornbill News Agency.

Subscribe to this Blog via Email :