Thursday, May 17, 2018

aung7

ရွှေကြွေးကျန်ရှိ အမျိုးသားကြီးပွားတိုးတက်ရေးကုမ္ပဏီကို တရားစွဲတော့မည်

ရန်ကုန်၊ မေ ၁၇

ရွှေထွက်ရာ မိုးထိမိုးမိဒေသတွင် လုပ်ပိုင်ခွင့်ရထားခဲ့သော အမျိုးသားကြီးပွားတိုးတက်ရေးကုမ္ပဏီမှာ အစိုးရထံ ပေးသွင်းရမည့် ရွှေပိဿာ ၁၂၀၀ ကျော်ကို မပေးသွင်းနိုင်သေးသည့်အတွက် နိုင်ငံတော်က ပြန်လည်ရယူလိုမှုဖြင့် ရမည်းသင်းမြို့နယ် ရဲစခန်းတွင် တရားစွဲဆိုရန် ဆောင်ရွက်လျက်ရှိကြောင်း အမှတ် (၂) သတ္ထုတွင်းလုပ်ငန်း၊ ဦးဆောင်ညွှန်ကြားရေးမှူး ဦးသာနိုင်က ပြောဆိုလိုက်သည်။

အဆိုပါ ကုမ္ပဏီမှာ ရွှေတူးဖော်ခွင့်စာချုပ်ပါ စည်းမျဉ်းစည်းကမ်းများ ဖောက်ဖျက်မှုဖြင့် ဖေဖ်ာဝါရီ ၁၇ ရက်တွင် လုပ်ပိုင်ခွင့် ရပ်ဆဲခံထားရသည့် ကုမ္ပဏီဖြစ်ပြီး စာချုပ်စည်းကမ်းအရ လုပ်ပိုင်ခွင့် ရပ်စွဲပြီး ရက်ပေါင်း ၉၀ အကြာ ယနေ့တွင် စာချုပ်ကိုပါ အပြီးရပ်စဲလိုက်ပြီ ဖြစ်သည်။

“ပါမစ်ရပ်ဆဲပြီးနောက်ပိုင်း စာချုပ်စည်းကမ်းအရ ရက်ပေါင်း ၉၀ ကြာလို့ရှိရင် စာချုပ်ကို ရပ်ဆဲဖို့ ဒီနေ့ ၁၇ ရက်နေ့က ရက်ပေါင်း ၉၀ ရက်နေ့ ဖြစ်ပါတယ်။ ဒါကြောင့် ဒီနေ့ ၁၇ ရက်နေ့မှာ စာချုပ်ကို အပြီရပ်ဆဲပြီး ဖြစ်ပါတယ်။ စာချုပ်အရ ပေးသွင်းဖို့ ကျန်တာ ပိဿာ ၁၂၀၀ ကျော်ရှိပါတယ်။ ဒါဟာ စာချုပ်အရ ပေးသွင်းရန် ကျန်တာ ဖြစ်ပါတယ်။ လက်ရှိ အနေအထားအရ နိုင်ငံတော်က ရလိုမှုနဲ့ တရားရုံးမှာ တရားစွဲဖို့ ဆောင်ရွက်နေပါတယ်” ဟု ဦးဆောင်ညွှန်ကြားရေးမှူး ဦးသာနိုင်က ပြောသည်။

ထို့ပြင် လုပ်ပိုင်ခွင့်ရပ်စဲခံရသည့် နောက်ပိုင်း ဆက်လက်တူးဖော်မှုများ လုပ်ကိုင်ခဲ့သည့်အတွက် ကုမ္ပဏီအား သတ္ထုတွင်းဥပဒေပုဒ်မ ၃၀ (က) ဖြင့်လည်း အစိုးရဘက်မှ တရားစွဲဆိုထားသေးသည်။

ရွှေကြွေးကျန်များ မပေးသွင်းနိုင်သေးသည့်အတွက် ယင်းကုမ္ပဏီဒါရိုက်တာ ရှစ်ဦးကို ပြည်ပထွက်ခွာခွင့် ပိတ်ထားကြောင်း ကုမ္ပဏီဒါရိုက်တာ ဦးစိုးထွန်းရှိက မီဒီယာသို့ ပြောဆိုထားသည်။

အမျိုးသားကြီးပွားတိုးတက်ရေးကုမ္ပဏီကဲ့သို့ မဟုတ်သော အသေးစားရွှေလုပ်ငန်းများက နိုင်ငံတော်သို့ ပေးသွင်းရန် ကျန်ရှိနေသည့် ရွှေစင်ကျပ်သားပေါင်း သောင်းနဲ့ချီ ရှိနေပြီး ကုမ္ပဏီလေးခုနှင့် တရားရုံးမှ အမိန့်ချပြီး ကုမ္ပဏီနှစ်ခု ရှိသည်။

“အသေးစားရွှေလုပ်ငန်းများ၏ ရွှေကြွေးကျန်ဆောင်ရွက်ချက် ၂၀၀၇၊ ၂၀၀၈ လောက်က စပြီးကျန်ရှိနေတဲ့ ကြွေးကျန် ဖြစ်ပါတယ်။ ၃၀. ၄. ၂၀၁၈ ရက်နေ့ထိ ပေးရန်ကျန် ရွှေစင်ပေါင်း ၁၃၆၅၈.၆၇ ကျပ်သား ဖြစ်ပါတယ်” ဟု ဦးသာနိုင်က ဆိုသည်။

ထို့ပြင် တရားစွဲဆိုရန်အတွက် တရားမအဆိုလွှာ မူကြမ်းတင်ပြထားပြီး ကုမ္ပဏီလေးခု ရှိကာ ကြွေးကျန်ပေးသွင်းရန် ကျန်ရှိသော ကုမ္ပဏီပေါင်း ၁၃၀ ကိုလည်း တရားစွဲဆိုသွားရန်အတွက် အစိုးရက ဆောက်ရွက်နေဆဲ ဖြစ်သည်။

ပြည့်အောင်

aung7

About aung7 -

Aung Htun Linn.. The Hornbill News Agency.

Subscribe to this Blog via Email :