Sunday, April 1, 2018

aung7

ပြည်သူ၏ နားလည်ထောက်ခံ အားပေးမှုမှာ မဖိုးမဖြတ်နိုင်သော တန်ဖိုးဟု အတိုင်ပင်ခံ ပြော

ရန်ကုန်၊ ဧပြီ ၂

အမျိုးသားဒီမိုကရေစီအဖွဲ့ချုပ် NLD အစိုးရအတွက် ပြည်သူတို့၏ နားလည်ထောက်ခံ အားပေးမှုမှာ မဖိုးမဖြတ်နိုင်သော တန်ဖိုးပင်ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က နိုင်ငံတော်အစိုးရ တာဝန်ထမ်းဆောင်မှု (၂) နှစ်ပြည့် မိန့်ခွန်း၌ ထည့်သွင်း ပြောဆိုလိုက်သည်။

ဧပြီလ ၁ ရက်က နိုင်ငံမီဒီယာများမှတစ်ဆင့် လွှင့်ထုတ်ပြောဆိုခဲ့သော အတိုင်ပင်ခံ၏ မိန့်ခွန်းတွင် ယင်းသို့ ထည့်သွင်း ပြောဆိုထားခြင်း ဖြစ်သည်။

“အားလုံးထက် ကျွန်မတို့အတွက် အရေးအကြီးဆုံးသင်ခန်းစာကတော့ ပြည်သူရဲ့ နားလည်ထောက်ခံမှု၊ အားပေးမှုများရဲ့ အဖိုးမဖြတ်နိုင်တဲ့ တန်ဖိုးပါပဲ။ ဒါကြောင့် ယခုလာမယ့် မြန်မာသက္ကရာဇ် ၁၃၈၀ ခုနှစ်အတွက် ကျွန်မတို့ အစိုးအနေနဲ့ စုပေါင်းအင်အားကို အလေးထားပြီး နိုင်ငံရဲ့ စိန်ခေါ်မှုကြီးများကို ကျော်ဖြတ်ဖို့ သန္နိဋ္ဌာန် ချလိုက်ပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောဆိုလိုက်သည်။

လက်ရှိတွင် နိုင်ငံအနေဖြင့် နိုင်ငံရေး၊ စီးပွားရေး၊ လူမှုရေးအရ ဖွံ့ဖြိုးတိုးတက်စေရန် စတင်ရုန်းကန်ချိန်တွင် ပြည်တွင်း၊ ပြည်ပ စိန်ခေါ်မှုမျိုးစုံဖြင့် ရင်ဆိုင်နေရကြောင်းနှင့် ပြည်သူများ၏ လူမှုစီးပွားဘ၀ တိုးတက်မြင့်မားရေးမှာ အစိုးရ၏ အဓိက ရည်မှန်းချက်တွင် ပါဝင်ကြောင်းလည်း ထည့်သွင်းပြောဆိုခဲ့သေးသည်။

“ဒီရည်မှန်းချက် ဘယ်လောက်အထိ ဖြစ်မြောက်အောင် စွမ်းဆောင်နိုင်တယ်ဆိုတာ တကယ်တော့ ပြည်သူတွေကပဲ ဆုံးဖြတ်နိုင်ပါတယ်။ လမ်းတွေ ဘယ်နှမိုင်ဖောက်နိုင်ခဲ့တယ်၊ တံတားတွေ ဘယ်နှခု တိုးတက်လာတယ်၊ လျှပ်စစ်မီးရသွားတဲ့ ကျေးရွာတွေ၊ မြို့တွေ ဘယ်လောက် များလာတယ်၊ စသဖြင့် … မွေးကင်းစမိခင်နဲ့ ကလေးဆုံးရှုံးမှုနှုန်းက ဘယ်လောက်မြင့်နေသေးတယ်၊ ရင်းနှီးမြှုပ်နှံမှု ဘယ်လောက် နည်းနေသေးတယ်၊ ငွေကြေးဖောင်းပွမှု ဘယ်လောက်ရှိနေသေးတယ်… ဒါတွေ၊ ဒါတွေကို ကိန်းဂဏန်းတွေနဲ့ ပြည်သူတွေကို တာဝန်သိစိတ်နဲ့ ပွင့်လင်းမြင်သာမှုကို အလေးထားတဲ့ အစိုးရပီပီ စဉ်ဆက်မပြတ် အသိပေးဖို့ ၀န်ကြီးဌာနအားလုံးကို ညွှန်ကြားထားပါတယ်။ ဒါပေမဲ့လည်း နိုင်ငံတစ်နိုင်ငံရဲ့ တိုးတက်မှုကို ကိန်းဂဏန်းနဲ့ ပြည့်စုံအောင် ဖော်ပြလို့ မရပါဘူး။ တစ်ခါတစ်လေလည်း အဖွဲ့အစည်းများအကြား ကိန်းဂဏန်းတွက်ချက်မှု မတူတာကြောင့် အဖြေမှန်ကို သိဖို့ ခက်ပါတယ်။ ကိန်းဂဏန်းတွေက ပြနေတဲ့ အခြေအနေတွေဟာ ပြည်သူများရဲ့ လူမှုဘ၀ စီးပွားအပေါ် ဘယ်လောက် အစစ်အမှန်သက်ရောက်မှုရှိသလဲဆိုတာကသာ အဓိပါ” ဟု ဒေါ်အောင်ဆန်းစုကြည်က မိန့်ခွန်းတွင် ထည့်သွင်း ပြောဆိုထားသည်။

အောက်ချင်းသစ္စာ သတင်းအေဂျင်စီ

aung7

About aung7 -

Aung Htun Linn.. The Hornbill News Agency.

Subscribe to this Blog via Email :