Sunday, May 8, 2016

aung7

ကော်မတီများ ဖွဲ့ပြီးနောက် ထွက်ပေါ်လာသည့် ဒုသမ္မတနှစ်ဦး၏ တာဝန်များ

ရန်ကုန်၊ မေ ၉

နိုင်ငံ၏ အကျိုးစီးပွားနှင့် သက်ဆိုင်သည့် ကော်မတီများကို သမ္မတဦးထင်ကျော်က မတ်လဆန်းတွင် ဖွဲ့စည်းလိုက်ရာ ဒုသမ္မတများဖြစ်သည့် ဒုသမ္မတ (၁) ဦးမြင့်ဆွေနှင့် ဒုသမ္မတ (၂) ဦးဟင်နီရီဗန်ထီးယူတို့ ကိုယ်တွယ်လုပ်ဆောင်ရမည့် လုပ်ငန်းတာဝန်များလည်း ထွက်ပေါ်လာခဲ့ပြီ ဖြစ်သည်။

နိုင်ငံအတွက် အရေးအကြီးဆုံးဖြစ်သည့် အမျိုးသားစီမံကိန်းကော်မရှင်တွင်မူ ဥက္ကဋ္ဌအဖြစ် သမ္မတ ဦးထင်ကျော် ဦးဆောင်ကာ ဒုသမ္မတနှစ်ဦးစလုံးက ဒုဥက္ကဋ္ဌများအဖြစ် တာဝန်ယူကာ ပြည်သူလူထု၏ လူနေမှုဘ၀ တိုးတက်မြင့်မားရေးအတွက် လုပ်ဆောင်သည့် စီမံကိန်းများ၊ ဖက်စပ်လုပ်ငန်းများအား ထိရောက်စွာ ကြီးကြပ်ဆောင်ရွက်ရေး၊ စီမံကိန်းများ မဆောင်ရွက်မီ လေ့လာမှုပြုရန် ဆုံးဖြတ်ချက်များ ချမှတ်ခြင်းနှင့် စရိတ်ကျော်လွန်သုံးစွဲခြင်းနှင့် သတ်မှတ်ကာလ ကျော်လွန်ဆောင်ရွက်သည့် စီမံကိန်းများအား ထိရောက်စွာ ကြီးကြပ်နိုင်ရန်၊ နိုင်ငံတော် ဘဏ္ဍာငွေ နစ်နာဆုံးရှုံးမှုများ အကာအကွယ်ပေးရန်အတွက် လုပ်ဆောင်သွားကြမည် ဖြစ်သည်။

ဒုဥက္ကဋ္ဌအဖြစ် သမ္မတရုံး ပြည်ထောင်စုဝန်ကြီး ဒေါ်အောင်ဆန်းစုကြည် ကိုယ်တိုင်ပါဝင်မည့် ပုဂ္ဂလိကပိုင် ပြုလုပ်ရေးကော်မရှင်ကိုမူ ဒုသမ္မတ (၁) ဦးမြင့်ဆွေက ဥက္ကဋ္ဌအဖြစ် ဦးဆောင်မည်ဖြစ်ကာ ကော်မရှင်အနေဖြင့် နိုင်ငံပိုင်ကဏ္ဍ လျော့ချကာ ပုဂ္ဂလိကကဏ္ဍ မြင့်မားလားရေး၊ စွမ်းဆောင်ရည် ကျဆင်းသည့် နိုင်ငံပိုင်လုပ်ငန်းများအား စွမ်းဆောင်ရည် တိုးတက်ရေးအလို့ငှာ ပုဂ္ဂလိကပိုင်ပြုလုပ်ရေး၊ ပုဂ္ဂလိကပိုင်ပြုလုပ်မည့် လုပ်ငန်းများအား နိုင်ငံတကာ လုပ်ထုံးလုပ်နည်းများနှင့်အညီ ပြုလုပ်ရေး စသည့် လုပ်ငန်းများကို အကောင်အထည်ဖော် လုပ်ဆောင်ရမည် ဖြစ်သည်။

ဒုသမ္မတ (၂) ဖြစ်သူ ဦးဟင်နရီဗန်ထီးယူမှာ စာရင်းအင်းအချက်အလက်များ မှန်ကန်ရေးနှင့် အရည်အသွေး ပြည့်ဝရေး ကော်မတီတွင် နာယကအဖြစ် တာဝန်ယူကာ လက်တွေ့ကျသည့် စီမံကိန်းများနှင့် မူဝါဒများ မှန်ကန်စွာ ချမှတ်နိုင်ရေးနှင့် ထိရောက်စွာ အကောင်အထည်ဖော်နိုင်ရေး၊ စောင့်ကြည့် လေ့လာရန်နှင့် သုံးသပ်နိုင်ရန်၊ စာရင်းအင်း အချက်အလက်များ မှန်ကန်ရေးနှင့် အရည်အသွေး ပြည့်ဝရေး ကိစ္စရပ်အား သက်ဆိုင်ရာ ၀န်ကြီးဌာနများ၊ Stakeholders များနှင့် ထိရောက်စွာ ပူးပေါင်း ဆောင်ရွက်နိုင်ရန်တို့အတွက် ကော်မရှင်က အဓိကထား လုပ်ဆောင်သွားမည် ဖြစ်သည်။

ထို့ပြင် ဒုသမ္မတ (၂) ဦးဟင်နရီဗန်ထီးယူမှာ လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးဗဟိုကော်မတီတွင် ဥက္ကဋ္ဌအဖြစ် တာဝန်ယူမည်ဖြစ်ကာ တိုင်းနှင့် ပြည်နယ်အလိုက် အောက်ခြေ ရပ်ကွက်/ကျေးရွာအဆင့်အထိ လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးကော်မတီများ အဆင့်ဆင့် ဖွဲ့စည်းရန်၊ မြေသိမ်းဆည်းမှုများနှင့် ပတ်သက်၍ အာဏာပိုင်အဖွဲ့အစည်းများ၏ ဖြေရှင်းဆောင်ရွက်မှုများကို ကြီးကြပ်ဆောင်ရွက်ရန်၊ အစိုးရနှင့် ပုဂ္ဂလိကလုပ်ငန်းများက ပြန်လည်စွန့်လွှတ်သည့် လယ်ယာမြေများအား မူလပိုင်ရှင်များထံ လုပ်ထုံးလုပ်နည်းနှင့်အညီ အမြန်ပေးအပ်နိုင်ရန် စသည့် လုပ်ငန်းရပ်များကို အဓိကထား လုပ်ဆောင်မည် ဖြစ်သည်။

ယင်းကဲ့သို့သော ကော်မတီကို သမ္မတဦးသိန်းစိန် လက်ထက်တွင် ဒုသမ္မတ (၂) ဖြစ်သူ တပ်မသားဟောင်း ဦးဉာဏ်ထွန်းအား ဦးဆောင်စေ၍ လုပ်ကိုင်စေခဲ့သော်လည်း လယ်ယာမြေ အငြင်းပွားမှု ပြဿနာများမှာ ဆက်လက်ဖြစ်ပွားခဲ့ကာ အထင်ကရဖြစ်ခဲ့သည့် ကိစ္စရပ်များမှာ လက်ပံတောင်း လယ်မြေသိမ်းဆည်းမှု ပြဿနာ ဖြစ်သည်။

အဆိုပါ လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေးဗဟိုကော်မတီ ဖွဲ့စည်းကြောင်း ကြေညာချက်တွင် “ယခုအစိုးရသည် လယ်ယာမြေ အငြင်းပွားမှု ပြဿနာများကို အထူးဦးစားပေးပြီး အမြန်ဆုံး ဖြေရှင်းရန် ကြိုးစားဆောင်ရွက်လျက် ရှိပါသည်။ ထို့ကြောင့် လယ်ယာမြေသိမ်းဆည်းခြင်း ကိစ္စရပ်များကို ဥပဒေနှင့်အညီ ဖြေရှင်းဆောင်ရွက်ပြီးသည်အထိ ရပ်ဆိုင်းထားရန်” အတွက်လည်း သမ္မတဦးထင်ကျော်က လမ်းညွှန်ချက် ပေးထားသေးသည်။

အောက်ချင်း သတင်းအေဂျင်စီ

aung7

About aung7 -

Aung Htun Linn.. The Hornbill News Agency.

Subscribe to this Blog via Email :