Wednesday, May 4, 2016

aung7

ပြု ပြင်ထိန်းသိမ်းရန် လိုအပ်နေသည့် ဆည်၊ တမံနှင့် သဘာဝမြေပြိုကန်များ အစိုးရအတွက် ကြီးမားသည့်စိန်ခေါ်မှု ဖြစ်လာနိုင်

ချင်းတောင်တန်းပေါ်တွင် ဖြစ်ပေါ်နေသည့် သဘာဝမြေပြိုကန်တစ်ခု
ရန်ကုန်၊ မေ ၅

ပြည်သူလူထု၏ အသက်အိုးအိမ်၊ စည်းစိမ်အား ခြိမ်းခြောက်နေသည့် ပြုပြင်ထိန်းသိမ်းရန် လိုအပ်နေသော ဆည်မြောင်း တမံများအရေးအား အစိုးရအနေဖြင့် အချိန်မီ ဖြေရှင်းခြင်းမပြုလုပ်ပါက အစိုးရအတွက် ကြီးမားသည့် စိန်ခေါ်မှုတစ်ရပ် ဖြစ်လာမည်ဖြစ်ကြောင်း ပုလဲမဲဆန္ဒနယ်မှ ဒေါ်ခင်စန်းလှိုင်က မကွေးတိုင်း၊ မုန်းချောင်းအတွင်းရှိ ဆည်တမံနှင့် ချင်းတောင်ရှိ မြေပြိုကန်အန္တရာယ်ဆိုင်ရာ အဆိုတင်သွင်းမှုတွင် ထည့်သွင်း ပြောဆိုလိုက်သည်။

၂၀၁၅ ခုနှစ်အတွင်း ရေကြီးရေလျှံမှုများ ကြုံတွေ့ခဲ့ရပြီး မကွေးတိုင်း မုန်းချောင်းအတွင်းရှိ မုန်းချောင်းနှင့် ကျီးအုံကျီးဝဆည် ပျက်စီးမှုအခြေအနေ၊ စစ်ကိုင်းတိုင်း ရာဇဂြိုဟ်ဆည်အထက် ချင်းတောင်တန်းပေါ်ရှိ မြေပြိုကန်အန္တရာယ်တို့နှင့် ဆက်စပ်၍ ကြိုတင်ကာကွယ်မှုများ လုပ်ဆောင်သင့်ကြောင်း ပြည်ထောင်စုအစိုးရအား တိုက်တွန်းကြောင်းအဆိုကို မေလ ၅ ရက် ပြည်သူ့လွှတ်တော်အစည်းအဝေးတွင် တင်သွင်းစဉ် ပြောကြားခဲ့ခြင်း ဖြစ်သည်။

“ကမ္ဘာပေါ်မှာ ငလျင်အန္တရာယ်ကလွဲပြီး အခြားဘေးအန္တရာယ်တွေဟာ ကြိုတင်လေ့လာ သိရှိကာကွယ်နိုင်တဲ့ အခြေအနေမှာ ရှိပါတယ်။ မိမိနိုင်ငံ ဖွံ့ဖြိုးတိုးတက်ရေးအတွက် အရင်းအနှီး ကြီးမားစွာ တည်ဆောက်ခဲ့ကြရတဲ့ အခြေခံအဆောက်အအုံကြီးတွေရဲ့အပေါ်မှာ အန္တရာယ်ရှိနေခြင်းနဲ့ ၎င်းတို့ရဲ့ ထိခိုက်မှုကြောင့် နိုင်ငံသူ နိုင်ငံသားတို့ရဲ့ဘ၀၊ အသက်မွေးမှုနဲ့ အိုးအိမ်စည်းစိမ်တို့ကို ခြိမ်းခြောက်နေခြင်းတို့ကြောင့် ကြိုတင်ပြင်ဆင် ကာကွယ်နိုင်ရန် အချိန်မီ အင်တိုက်အားတိုက် ဆောင်ရွက်ရမယ့်အချိန်မှာ ဆောင်ရွက်မှုတွေ နှေးကွေးနောက်ကျနေမယ်ဆိုရင်၊ အကြောင်းအမျိုးမျိုးတွေ ပြနေကြဦးမယ်ဆိုရင်၊ ကျွန်မတို့ကလည်း အခုလိုမျိုး လွှတ်တော်မှာ တင်ပြနိုင်ဖို့ရာ အခွင့်အရေး မရှိခဲ့ဘူးဆိုရင် ပြည်သူ့လွှတ်တော်နဲ့တကွ နိုင်ငံတော်အစိုးရအတွက် တာဝန်မကျေပွန်မှုအဖြစ် မှတ်တမ်းတင် ကျန်ရစ်မှာဖြစ်သလို ကျွန်မတို့ရဲ့ အစိုးရသစ်အတွက် ကြီးမားတဲ့ စိန်ခေါ်မှုနဲ့ ရင်ဆိုင်ရမှာ ဖြစ်ပါတယ်” ဟု ဒေါ်ခင်စန်းလှိုင်က ပြောသည်။

ယင်းအဆိုကို သင်္ကြန်ကာလ လွှတ်တော်မရပ်နားမီ ဧပြီလ အစောပိုင်းကတည်းက အရေးကြီး အဆိုအနေဖြင့် တင်သွင်းခဲ့သော်လည်း လတ်တလောဖြစ်ပျက်နေသည့် ကိစ္စရပ်မဟုတ်သည့်အတွက်ဟူသည့် အကြောင်းပြချက်ဖြင့် မေလ ၅ ရက် လွှတ်တော်အစည်းအဝေးတွင် သာမန်အဆိုအဖြစ်သာ တင်သွင်းခွင့် ရခဲ့ခြင်း ဖြစ်သည်။

မကွေးတိုင်းဒေသကြီး မုန်းချောင်းတစ်လျှောက် လွန်ခဲ့သော နှစ်ပေါင်း ၂၀ ခန့်ကတည်းက တည်ဆောက်ခဲ့သည့် ဆည်များ၊ ရေထိန်းတံခါးများမှာ ယင်းကာလ အခြေခံအချက်အလက်များ အပေါ် တွက်ချက်တည်ဆောက်ခဲ့ခြင်းဖြစ်ကာ ယခုအခါ ပြောင်းလဲလာသည့် အခြေခံအချက်များကြောင့် လိုက်လျောညီထွေမှု မရှိတော့ကြောင်း၊ ယင်းအတွက် ယခုခေတ်ကာလနှင့် လိုက်လျောညီထွေမှုရှိအောင် ပြုပြင်နိုင်ရန်အတွက် ပြန်လည်ဆန်းစစ်မှုများ လုပ်သင့်ကြောင်းကိုလည်း ဒေါ်ခင်စန်းလှိုင်က တိုက်တွန်းထားသည်။ ထို့ပြင် စစ်ကိုင်းတိုင်း ရာဇဂြိုဟ်ဆည် အထက် ချင်းတောင်တန်းများပေါ်ရှိ သဘာဝမြေပြိုကန်များ အန္တရာယ်နှင့် စိုးရိမ်ရဖွယ် အခြေအနေများကို ထည့်သွင်း တင်ပြခဲ့သည်။

၂၀၁၅ ခုနှစ် ဇူလိုင်လမှ စက်တင်ဘာလအတွင်း ဖြစ်ပေါ်ခဲ့သည့် နိုင်ငံတစ်ဝန်း ရေကြီးရေလျှံမှုများကြောင့် အိမ်ထောင်စုပေါင်း ခြောက်သောင်းကျော် (လူဦးရေ သုံးသိန်းကျော်) ရေဘေးသင့်ခဲ့ရပြီး လူ ၁၀၀ ခန့် အသက်ဆုံးရှုံးခဲ့ရသည်။ ချင်းပြည်နယ်တွင်လည်း တောင်ပြိုမြေပြိုမှုကြောင့် အိမ်ထောင်စုပေါင်း ၃၀၀၀ ကျော် နေအိမ်များ ရွေ့ပြောင်းခဲ့ရသည်။

ထို့ပြင် ချင်းတောင်တန်းများပေါ်ရှိ သဘာဝမြေပြိုကန် ကျိုးပေါက်မှုကြောင့် တွန်းဇံမြိုနယ်၊ ဟားခါးလေးကျေးရွာအတွင်း ရွံ့နွံများ စီးဝင်ကာ ရွာပျက်စီးခဲ့ကာ ချင်းတောင်တန်းများပေါ်တွင် လူမှု ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၏ ဆန်းစစ်လေ့လာချက်များအရ သဘာဝမြေပြိုကန် ငါးကန်အထိ ရှိသည်။

“မုတ်သုန်ရာသီက အလုံးအရင်းနဲ့ ၀င်ရောက်လာတော့မှာ ဖြစ်ပါတယ်။ ရက်တွက်ကြည့်မယ်ဆိုရင် အချိန် သိပ်မကျန်တော့ပါဘူး။ အချိန်မီ ပြင်ဆင်ကာကွယ်မှုမှ မလုပ်ဆောင်နိုင်ဘူးဆိုရင် စစ်ကိုင်းတိုင်းဒေသကြီး၊ ချင်းပြည်နယ်၊ မကွေးတိုင်းတို့မှာရှိတဲ့ လူဦးရေ နှစ်သိန်းခွဲကျော်ဟာ ယခင်နှစ်ကထက် ကြီးမားတဲ့ သဘောဝဘေးအန္တရာယ်နဲ့ ရင်ဆိုင်ရဖွယ် ရှိနေပါပြီ” ဟု ပုလဲမဲဆန္ဒနယ်မှ ဒေါ်ခင်စန်းလှိုင်က ပြောသည်။

ဒေါ်ခင်စန်းလှိုင် တင်သွင်းသည့် ပြည်ထောင်စုအစိုးရအား တိုက်တွန်းကြောင်း အရေးကြီးအဆိုနှင့် ပတ်သက်၍ ရန်ကုန်တိုင်း၊ ဆိတ်ကြီးခနောင်တိုမှ ပြည်သူ့လွှတ်တော် ကိုယ်စားလှယ် ဦးတင်ထွန်းနိုင်က ထောက်ခံဆွေးနွေးပြီးနောက် ယင်းအဆိုအား ဆက်လက်ဆွေးနွေးရန် သင့်၊ မသင့် ကိုယ်စားလှယ်များ၏ သဘောထားခံယူခဲ့ရာ သဘောမတူသူ မရှိသည့်အတွက် အဆိုကို ဆက်လက်ဆွေးနွေးရန် လွှတ်တော်က ဆုံးဖြတ်ခဲ့သည်။

အောက်ချင်း သတင်းအေဂျင်စီ

aung7

About aung7 -

Aung Htun Linn.. The Hornbill News Agency.

Subscribe to this Blog via Email :